- नर्वेले सेनेगललाई ३-२ ले पराजित गर्दै २८ वर्षपछि फिफा विश्वकपको नकआउट चरणमा स्थान सुरक्षित गरेको छ।
- खेलमा एर्लिङ हाल्यान्डले दुई गोल र मार्कस पेडरसनले एक गोल गर्दै टोलीको जित सुनिश्चित गरे।
- समूह 'आई' बाट नर्वे र फ्रान्स अघिल्लो चरणमा प्रवेश गर्दा सेनेगल र इराक प्रतियोगिताबाट बाहिरिएका छन्।
- सन् १९९८ पछि पहिलोपटक विश्वकपमा पुनरागमन गरेको नर्वेले एक खेल अगावै ऐतिहासिक सफलता प्राप्त गरेको हो।
काठमाडौं । २८ वर्षपछि फिफा विश्वकपमा पुनरागमन गरेको नर्वेले नकआउट चरणमा स्थान सुरक्षित गरेको छ। मंगलबार बिहान न्यूयोर्क–न्यु जर्सी स्टेडियममा सम्पन्न समूह ‘आइ’ अन्तर्गतको खेलमा नर्वेले सेनेगललाई ३–२ ले पराजित गर्दै महत्वपूर्ण जित दर्ता गरेको हो।
खेलको पहिलो हाफको ४३औँ मिनेटमा मार्कस होल्मग्रेन पेडरसनले गोल गर्दै नर्वेलाई अग्रता दिलाएका थिए। दोस्रो हाफ सुरु भएको केही क्षणमै ४८औँ मिनेटमा एर्लिङ हाल्यान्डले गोल थप्दै टोलीलाई २–० को अग्रतामा पुर्याए।
तर सेनेगलले ५३औँ मिनेटमा इस्माइला सारमार्फत गोल फर्काउँदै खेलमा फर्किने प्रयास गर्यो। त्यसपछि ५८औँ मिनेटमा हाल्यान्डले व्यक्तिगत दोस्रो गोल गर्दै नर्वेको अग्रता ३–१ मा पुर्याए।
इन्जुरी समयमा इस्माइला सारले व्यक्तिगत दोस्रो गोल गरे पनि सेनेगललाई खेल बराबरी गर्न पर्याप्त समय रहेन। निर्धारित समय सकिँदा नर्वे ३–२ गोल अन्तरले विजयी भयो।
यस जितसँगै नर्वेले २८ वर्षपछि विश्वकपमा पुनरागमन गर्दै एक खेल अगावै नकआउट चरणमा स्थान सुरक्षित गरेको छ। नर्वेले पछिल्लो पटक सन् १९९८ को विश्वकप खेलेको थियो, त्यसपछि लामो समयसम्म छनोट हुन सकेको थिएन।
समूह ‘आइ’ मा नर्वे र फ्रान्स दुवै ६–६ अंकसहित नकआउट चरणमा प्रवेश गरेका छन्। गोल अन्तरका आधारमा फ्रान्स शीर्ष स्थानमा छ। सेनेगल र इराक लगातार दुई खेलमा पराजित हुँदै अंकविहीन अवस्थामा छन्।
