- नेकपा (एमाले) र माओवादी केन्द्रबीच वाम एकता र सहकार्यका लागि औपचारिक तथा अनौपचारिक संवाद पुनः तीव्र पारिएको छ।
- मदन भण्डारीको जन्मजयन्तीका अवसरमा आयोजना हुने कार्यक्रममा ओली र प्रचण्ड लामो समयपछि एउटै मञ्चमा देखिँदैछन्।
- अध्यक्ष प्रचण्डले तत्काल पूर्ण एकता नभए पनि एमालेसँगको सहकार्य र संवाद सकारात्मक दिशामा अघि बढेको बताउनुभएको छ।
- विश्लेषकहरूले नेतृत्व व्यवस्थापन र शक्ति बाँडफाँटका कारण औपचारिक एकतामा पुग्न अझै केही समय लाग्ने आकलन गरेका छन्।
काठमाडौं। गत प्रतिनिधिसभा निर्वाचनमा अपेक्षाअनुसारको परिणाम हासिल गर्न नसकेपछि र त्यसयता फेरिएको राजनीतिक परिस्थितिका कारण प्रमुख वाम शक्तिहरूबीच पुनः एकता र सहकार्यको गृहकार्य अघि बढेको छ। विशेष गरी केपी शर्मा ओली नेतृत्वको नेकपा (एमाले) र पुष्पकमल दाहाल 'प्रचण्ड' संयोजक रहेको नेपाल कम्युनिस्ट पार्टी (नेकपा) बीच एकताका लागि औपचारिक तथा अनौपचारिक संवाद तीव्र बनेको राजनीतिक स्रोतहरूले जनाएका छन्। दुवै पक्षका प्रतिनिधिहरूबीच केही चरणमा छलफल भइसकेको र एकताको आधार, नेतृत्व, संगठनात्मक संरचना तथा राजनीतिक कार्यदिशामा ठोस सहमति जुट्न बाँकी रहे पनि सकारात्मक दिशामा अघि बढ्ने विषयमा दुवै दल सहमत देखिएका छन्।
यसअघि २०७५ सालमा तत्कालीन एमाले र माओवादी केन्द्रबीच एकता भई नेपाल कम्युनिस्ट पार्टी (नेकपा) गठन भए पनि नेतृत्व विवाद र सर्वोच्च अदालतको फैसलापछि उक्त एकता विघटन भएको थियो। त्यसयता सार्वजनिक रूपमा एकअर्काको तीव्र आलोचना गर्दै आएका ओली र प्रचण्ड पछिल्लो समय फेरि सहकार्यको पक्षमा उभिएका हुन्। दुवै नेताले आफ्ना प्रतिनिधिमार्फत संवाद अघि बढाउनुका साथै सार्वजनिक कार्यक्रममार्फत पनि एकताको सङ्केत दिन थालेका छन्।
यसै क्रममा मदन भण्डारीको ७५औँ जन्मजयन्तीका अवसरमा आइतबार काठमाडौंमा आयोजना हुने विचार गोष्ठीलाई विशेष राजनीतिक चासोका साथ हेरिएको छ। मदन भण्डारी फाउन्डेसनले राष्ट्रिय सभागृहमा आयोजना गर्न लागेको 'नेपालको कम्युनिस्ट आन्दोलन र जननेता मदन भण्डारी' विषयक कार्यक्रममा ओली र प्रचण्ड लामो समयपछि एउटै मञ्चमा सहभागी हुँदैछन्। उक्त कार्यक्रममा पूर्वराष्ट्रपति विद्यादेवी भण्डारी प्रमुख अतिथि रहनेछिन् भने नेकपाका सहसंयोजक माधवकुमार नेपाल, नेता झलनाथ खनाल तथा जनता समाजवादी पार्टी (जसपा) नेपालका अध्यक्ष उपेन्द्र यादवको पनि सहभागिता रहने तय भएको छ। राजनीतिक वृत्तमा यस संयुक्त उपस्थितिलाई वाम एकताको सन्देश प्रवाह गर्ने प्रयासका रूपमा विश्लेषण गरिएको छ।
यसैबीच, प्रचण्डले शुक्रबार विराटनगरमा आयोजित पार्टीको कोशी प्रदेश कमिटीको बैठकलाई सम्बोधन गर्दै वर्तमान राजनीतिक परिस्थितिमा संसद र सडक दुवै मोर्चामा एमालेसँग सहकार्य आवश्यक भएको उल्लेख गर्नुभएको छ। उहाँले तत्कालै पार्टी एकता भइहाल्ने सम्भावना नरहे पनि सहकार्यको वातावरण बनिसकेको र छलफल सकारात्मक निष्कर्षतर्फ उन्मुख रहेको बताउनुभयो। आफ्नो राजनीतिक यात्रामा पटक–पटक 'क्रमभंग' गर्दै आएको स्मरण गर्दै प्रचण्डले आगामी महाधिवेशनबाट फेरि नयाँ र आफ्नो जीवनको "अन्तिम क्रमभंग" हुने सङ्केत गर्दै पार्टी पंक्तिलाई तयार रहन आग्रह गर्नुभएको छ। यद्यपि, राजनीतिक विश्लेषकहरूले भने शीर्ष नेताहरूको अभिव्यक्ति र पर्दापछाडिका संवादले सहकार्यको सम्भावना बढाएको देखाए पनि विगतका अनुभव, नेतृत्व व्यवस्थापन र शक्ति बाँडफाँटका कारण औपचारिक एकतामा पुग्न अझै समय लाग्ने आकलन गरेका छन्।
